मालश्री खबर, फागुन १० गते रोल्पा । सेतोपाटी साभार
दाङको घोराहीमा सवारी दुर्घटनामा मृत्यु भएका रोल्पाका दुई युवाका परिवालाई क्षति पूर्ति बापत जनही १६ लाख रुपैयाँ दिने सहमति भएको छ ।
जिल्ला प्रशासन कार्यालयमा पीडित पक्ष, गाउँपालिकाका पदाधिकारी र प्रहरी प्रशासनका बीचमा बिहीबार त्यस्तो सहमति भएको हो ।
जनही १५ लाख क्षतिपूर्ति बापत र थप एक÷एक लाख किरिया खर्चबापत उपलब्ध गराउने सहमति भएको मृतकका आफन्तले सेतोपाटीलाई बताए । त्रिवेणी गाउँपालिका कार्यालयले पीडित पक्षलाई रकम उपलब्ध गराउने सहमति भएको हो ।
- Advertisement -
सहमति अनुसार मृतक दुबै परिवारका सम्पूर्ण सदस्यको पालिकाले आजीवन जीवन बीमा गराइदिने, मृतकका बालबच्चालाई उच्च शिक्षासम्म अध्यापन गर्न लाग्ने खर्च व्यहोर्ने, मृतकमध्ये नेत्र भण्डारीकी श्रीमतीलाई पालिकामा क्षमता अनुसारको रोजगारी दिने र अर्का मृतक विवेक (बालकृष्ण) पुन अविवाहित रहेको हुँदा उनकी एक दिदी र बहिनीलाई पनि गाउँपालिकामा रोजगारी दिने सहमति भएको छ ।
जिल्ला प्रहरी प्रवक्ता डिएसपी जनकबहादुर मल्लले पनि सहमतिपछि पीडित पक्षले शव बुझ्न राजी भएको बताए ।
राप्ती स्वास्थ्य विज्ञान प्रतिष्ठानमा अहिले दुई शवको पोष्टमर्टम सुरू भएको पनि आफन्तले जानकारी दिए ।
घोराहीको सर्रामा भएको सवारी दुर्घटनामा रोल्पाको त्रिवेणी गाउँपालिका –५ गुँइतीबाङका २४ वर्षीय नेत्र भण्डारी र सोही ठाउँका २१ वर्षीय विवेक पुनको मृत्यु भएको थियो । उनीहरू नाताले दाजुभाइ थिए। भण्डारी रोल्पामा पढाउने शिक्षक थिए भने पुन राप्ती बबई क्याम्पसमा अध्ययनरत विद्यार्थी थिए ।
बुधबार बिहान ६ बजेतिर तुलसीपुरबाट घोराहीतर्फ जाँदै गरेको विवेक पुनले चलाएको रा ५ प ५४५३ नम्बरको मोटरसाइकल घोराहीको सर्रा चोक नजिकै सडकमा पल्टिएको थियो। मोटरसाइकल पल्टिएर सडकमा लडेका दुई जनालाई घोराहीबाट तुलसीपुरतर्फ आउँदै गरेको त्रिवेणी गाउँपालिकाको बा २ झ ३६५२ नम्बरको बोलेरो जिपले ठक्कर दिएको थियो ।
गाउँपालिकाको गाडी चालक त्रिवेणी–२ का २९ वर्षीय निर्मल बुढा प्रहरी नियन्त्रणमा छन् ।
घटनाबारे थप अनुसन्धान हुन बाँकी रहेको प्रहरीले जानकारी दिएको छ ।
प्रतिक्रिया दिनुहोस्